Friday , November 22 2019
Loading...

Deputeti i Qarkut të Elbasanit Florenc Spaho, i pranishëm në Forumin e 21-të Parlamentar të Cetinjës

Deputeti i Qarkut të Elbasanit Florenc Spaho, ishte i pranishëm ditën e djeshme në Forumin e 21-të Parlamentar të Cetinjës. Ky Forum është nismë autoktone rajonale e bashkëpunimit parlamentar të vendeve të Evropës Jug-Lindore në rrugën e tyre drejt BE-së, dhe një formë e rëndësishme e inkurajimit dhe promovimit të dialogut parlamentar midis vendeve të rajonit.

Gjatë fjalës së tij Deputeti Spaho, mes të tjerash foli për punën e kujdesshme dhe angazhimin shumë serioz të Parlamentit tonë për të krijuar një klimë të favorshme për mediat.

Në një status në faqen e tij zyrtare të facebook z. Spaho tregon për eksperiencën e tij në këtë Forum:

Ditën e djeshme u ndjeva i nderuar që si deputet i Kuvendit të Shqipërisë përfaqësova kolegët e mi në Forumin e 21-të Parlamentar të Cetinjes. Ishte privilegj të ndaja panelin me një personalitet të rëndësishëm si Margareta Cederfelt, ish deputete suedeze dhe aktualisht Zëvendës Presidente e Asamblesë Parlamentare të OSBE-së, por edhe me politikanë të tjerë të nivelit të lartë përfaqësues nga shumë vende të rajonit.

Tema “Parlamenti dhe Mediat – Realiteti kundrejt Pritshmërive të Ndërsjella” na çoi në diskutime të gjata dhe secili prej nesh solli realitetin e vendit të tij. Pata mundësinë të flas për punën e kujdesshme dhe angazhimin shumë serioz të Parlamentit tonë për të krijuar një klimë të favorshme për mediat.

Fryma e bashkëpunimit në të cilën në vitin 2013 u miratua ligji “Për mediat audiovizive në Republikën e Shqipërisë”, vemendja e veçantë që Parlamenti i ka kushtuar përzgjedhjes së anëtarëve të AMA-s por edhe atyre të Këshillit Drejtues të Radiotelevizionit Publik Shqiptar janë tregues i një pjekurie në rritje në këtë aspekt.

Forumi ishte gjithashtu një mundësi për prezantimin e shembujve të mirë dhe për shkëmbimin e mendimeve mbi atë çka duhet të bëjnë parlamentet tona për të garantuar një liri të plotë të shprehjes dhe të medias.