Sunday , November 19 2017

Dita Botërore e Vajzave, ngrihet zëri kundër martesës së të miturave

Miliona vajza në botë më parë martohen se shkojnë në shkollë. Megjithëse ligji e ndalon, ato martohen kundër vullnetit të tyre. Në Ditën Botërore të Vajzave (23 Tetor) OKB drejton apel.

Nga Deutsche Welle

Dhunë shtëpiake dhe seksuale, keqtrajtime, shfrytëzim, deri edhe vdekje: Efektet negative të martesës së hershme të vajzave të vogla janë të njohura. Atyre u mohohen shanset e shkollimit dhe zhvillimit, rreziqet shëndetësore rriten. Në të gjithë botën martohen 15 miliona vajza para moshës 18 vjeçare, disa prej tyre sapo kanë mbushur 10 vjeç, sipas të dhënave të organizatës së OKB-së për fëmijët, UNICEF.

Shtatzani para pubertetit

Pasojat janë të rënda: Sipas një studimi të organizatës për mbrojtjen e fëmijëve “Save të children” ka një lidhje direkte mes martesës së hershme, shtatzanisë dhe vdekshmërisë foshnjore. “Gjatë shtatzanisë dhe lindjes rritet rreziku për nënat e reja”, thotë Susanne Schröter, drejtoreshë e institutit të Frankfurtit, Islami Global. Pas lindjes, nënat e reja të janë të mbingarkuara, sepse janë vetë fëmijë, thotë ajo. “Ky është një skandal, absolutisht.” Vajzat e reja shfrytëzohen sistematikisht, sepse dhëndri shpesh është shumë më i moshuar. “Ato nuk mund të mbrohen, sepse marrëdhëniet e pushtetit janë të tilla, që ato nuk mund të bëjnë dot rezistencë.”

Shtim i martesave të minoreneve

Në bazë të konventës të Kombeve të Bashkuara në shumicën e vendeve lejohet martesa e vajzave prej moshës 18 vjeç. Nga vitet 2015-2017 vende si Çadi, Malaui, Zimbabve, Kosta Rika, Ekuadori, Guatemala e kanë rritur moshën e martesës së vajzave në 18 vjeç. Susanna Krüger, drejtoreshë e organizatës “Save te children” thotë për Deutsche Wellen, se “kuadri ligjor ndihmon në ndryshimin afatgjatë të strukturave shoqërore.”

Megjithatë nga viti 2015 në të gjithë botën janë rritur rastet e martesave me minorene nga 11,3 në 11,5 milionë, një tendencë në vazhdim. Varfëria, lufta dhe konfliktet e mbajnë këtë sistem në funksionim. Krüger sqaron, se vetëm futja e një ligji në fuqi nuk mjafton. “Feja, kultura, strukturat shoqërore apo patriarkale janë të lidhura ngushtë më njëra-tjetrën dhe kushtëzojnë njëra-tjetrën.”

Në vend të shkollës martesa e detyruar- një fatkeqësi për 11,5 milionë vajza në botë…

Lufta në Siri shtoi fenomenin e martesave të minoreneve

Etnologja, Susanne Schröter thotë se konfliktet luftarake e shtojnë këtë fenomen, si në rastin e Sirisë. “Pas shpërthimit të konfliktit, sidomos pas fluksit të refugjatëve janë shtuar rastet e martesave të minoreneve. Madje janë martuar vajza 10 apo 11 vjeçare me pretendimin se kjo i mbron ato, edhe nga shfrytëzimi seksual. ”

Objektivi i OKB-së është që pas vitit 2030 të mos ketë më martesa të minoreneve. Organizata “Save the children” kërkon që politika të veprojë më me forcë kundrejt fenomenit. “Më e rëndësishmja është arsimimi, dhe tjetra vajtja në shkollë e vajzave e fëmijëve”, thotë Susanna Krüger. Sukseset më të mëdha deri më tani janë arritur në Amerikën Latine. Numri i martesave të tilla, pas ndryshimit të ligjit ka rënë ndjeshëm brenda dy vjetësh. Tani aty vetëm çdo e pesta vajzë i premtohet një të panjohuri. Një rreze shpresë në një fenomen të errët.

Loading...

Leave a Reply

Your email address will not be published. Required fields are marked *

%d bloggers like this: