Sunday , December 11 2016
ahmetaj

Miratohet draft/buxheti për 2017-ën, rritje pagash dhe pensionesh

Ministri i Financave, Arben Ahmetaj ka bërë të ditur se Qeveria ka kaluar draft buxhetin për vitin 2017. Sipas Ahmetaj, në këtë buxhet mbështetet rritja ekonomike me 3.8%.

Buxheti kap shifër e 467 miliardë lekëve dhe ka si synim uljen e borxhit publik, rritjen e pagave dhe pensioneve në muajin mars.

“Nuk ka në historinë financiare të financave publike të 20 viteve të fundit që një qeveri të ketë përgjegjshmëri maksimale për të vazhduar kosnolidimin fiskal në një vit elektoral”, u shpreh Ahmetaj.

“1. Buxheti i rritjes ekonomike – rritja përshpejtohet në 3.8%, ose rreth katërfishi i asaj që ishte në vitin 2013.

2. Buxheti i reformave – rreth 20 miliardë lekë për akomodimin e reformave thelbësore për ekonominë: reforma në drejtësi, reforma në administratën publike, reforma në pensione, reforma e pronave, refroma e decentralizimit dhe reforma e ujit.

3. Buxheti i rritjes së pagave dhe pensioneve – për herë të parë rreth 100 milionë dollarë (në 12 muaj) për rritjen e pagave dhe pensioneve 2017, fondi më i madh për paga dhe pensione i akorduar brenda një buxheti në 25 vite!

4. Buxheti i investimeve publike – buxheti 2017 siguron nivel optimal të investimeve publike 5% e GDP (investime qendrore + Fondi i Zhvillimit të Rajoneve + mbështetje për sektorin energjetik), duke pasur huamarrjen (deficitin) më të ulët të arritur ndonjëherë, prej rreth 2% të GDP, pra balancën korente më pozitive në 25 vite prej rreth 2.9%, duke kapërcyer madje edhe kufirin e rregullit të artë”, ka komentuar Ahmetaj.

Shefi i financave shqiptare ka bërë gjithashtu me dije se në vitin 2017 borxhi publik do të ulet me pothuajse 3%, në 69.1%; defiçiti do të jetë në nivelin 2%, më i ulëti sipas tij në 25 vite; balanca primare me suficit +0.7%; ndërsa pagat dhe pensionet do të rriten duke ulur borxhin.

/ Top Channel

Leave a Reply

Your email address will not be published. Required fields are marked *