Monday , June 25 2018
Loading...

Një lajm i mirë për emigrantët shqiptarë/ Greqia ul ndjeshëm tarifat për lejet e qëndrimit të emigrantëve

Parlamenti grek ka filluar diskutimin për një amendament të depozituar së fundmi nga Ministria e Politikave të Emigracionit, i cili do të votohet në ditët në vijim, që propozon uljen e tarifave të lejeve të qëndrimit të emigrantëve të huaj në masën mbi 50%, duke favorizuar në këtë mënyrë edhe qindra mijëra emigrantë shqiptarë.

Ulja e tarifave u përkasin lejeve të dhëna sipas udhëzimeve europiane, për të cilat emigrantët në Greqi kanë paguar deri tani më shumë sesa ata të vendeve të tjera të BE-së. Për  këtë Athina është paralajmëruar nga Komisioni Europian se mund të penalizohet.

Bëhet fjalë për rreth 24 mijë leje të rezidentit afatgjatë (epi makron), 51 mijë leje unike, 134 mijë leje për bashkim familjar, gati 900 leje për studime dhe kërkime, si dhe e ashtuquajtura “karta blu”.

Ndërmjetësi ndërkulturor në Ministrinë e Emigracionit, Fatos Malaj, deklaron për Top Channel se të gjitha lejet europiane, pavarësisht afatit, tarifat e të cilave shkojnë deri në 450 euro, tashmë do të unifikohen dhe do të kenë një vlerë prej 150 eurosh.

Amendamenti sjell gjithashtu një masë mjaft të favorshme për brezin e dytë të emigrantëve, që paguanin pas moshës 18 vjeç siguracion privat për të marrë leje qëndrimi, tani atë mund ta sigurojë njëri nga prindërit.

Ndërsa tarifat rriten për lejet që u jepen individëve ekonomikisht të pavarur, nga 300 në 1.000 euro, ndërsa nga 500 deri në 2.000 euro rritet vlera për ata persona që përfitojnë leje qëndrimi pasi kanë blerë pasuri të palujtshme ose investojnë në Greqi.

Amendamenti përkatës nuk ndryshon shumën prej 300 eurosh për lejen e qëndrimit të brezit të dytë të emigrantëve, ndërsa krijohet gjithashtu një tarifë e re për emigrantët që aplikojnë për lejet me qëndrim të përhershëm, si dhe rritet nga 50 në 100 euro pagesa për lejen e një punëtori sezonal.

Top Channel