Sunday , April 18 2021

“Portokallia” nuk mundi t’i bënte shoqe! Xhemi flet hapur për raportin me Eneda Tarifën

Xhemi Shehu e ka mbyllur përfundimisht kapitullin e televizionit dhe nuk ka më fare kthim mbrapa. Këtë sezon ajo nuk u shfaq më në “Portokalli” dhe duket se nuk do të kthehet më kurrë aty e në asnjë spektakël tjetër. Në një intervistë për revista “Who”, moderatorja ka pranuar se nuk do të jetë më kurrë pjesë e ekranit (vetëm nëse ndodh ndonjë çudi e madhe) dhe se tani do i dedikohet familjes së saj, bashkëshortit e dy djemve.

“Kam bërë edhe programe të tjera, që nuk është se më kanë ngjallur ndonjëfarë interesi ose më kanë dhënë ndonjë kënaqësi. I kam bërë se duheshin, por jo nga pasioni apo dëshira. I bëja, sepse doja të rikthehesha në ‘Portokalli. Prandaj dhe u tërhoqa nga ‘Portokallia’ sepse s’po merrja më kënaqësi,  dhe prandaj po them duhet të ndodhë ndonjë çudi që unë të rikthehem prapë, gjithmonë në një format të ngjashëm me ‘Portokalli’-në.

Nuk kam fare ambicien që të bëj programe të tjera. Kështu që me shumë gjasa i bie që unë jam tërhequr dhe e kam mbyllur njëherë e mirë me televizionin, sepse nuk është se mendoj se do bëhet diçka po aq e mirë sesa ‘Portokalli’-a dikur, sepse kjo që po shohim tani nuk mendoj se është maksimumi i atij spektakli. Ose mbase dhe është ezauruar dhe me kohën… Nuk e di, nuk di çfarë të them, por nuk më tërheq më”, është shprehur Xhemi.

Mirëpo a arriti ajo të krijojë miqësi brenda “Portokalli”-së, spektakli në të cilin kaloi një pjesë të mirë të karrierës? Xhemi ka treguar se me Salsanom gëzon një raport të mirë miqësor, ndërsa me Eneda Tarifën u përpoqën të ishin shoqe, por mbetën thjesht kolege, ndërsa tani nuk janë më asgjë bashkë.

“Kam pasur kimi me Salsanon, veçse s’mund të them që javët e para. Por u lidha më shumë pasi iku dhe Eneda për në ‘Eurovizion’. Atëherë patëm më shumë mundësi që të punonim me njëri-tjetrin dhe u bëmë shokë të ngushtë”. Po me Enedën? “Me Enedën? Me Enedën kam tentuar që të jem shoqe, por nuk ishte e thënë. Kështu që e kam thjesht kolege. Dhe tani nuk e kam asgjë, sepse nuk besoj që do punoj ndonjëherë më me të”, ka treguar Shehu.

“Shkoj shumë mirë me Salsanon, me Gazin, me Ledion. Tani unë mirë shkoj me të gjithë, që të kuptohemi, por me këta pak më shumë. Pastaj dhe me Albana Perhatin, Algionën edhe me Flor Binajn, me të cilin kam pasur më tepër marrëdhënie kur kam qenë në sezonin e parë fare. E njoh më përpara se Gazin, se Salsanon, por tani nuk është se bëhemi shumë”, ka shtuar moderatorja më tej.