Tuesday , March 2 2021

Ndërtohet shkolla e re në Mlizë të Elbasanit, Taulant Balla falenderon Emirin e Kuvajtit për mbështetjen

Mliza është një nga fshatrat e Elbasanit ku popullësia vjen në rritje. Banorët as janë larguar në qytet dhe as kanë emigruar. Si rrallë ndodh në fshat, numri i lartë i fëmijëve në shkollë, detyronte mësimin me dy turne. Për këtë shkak, me ndihmën e Emirit të Kuvajtit në fshatin Mlizë po ndërtohet një shkollë e re për arsimin fillor. Godina e re do të ketë 6 klasa shtesë, ndërtim i cili do të plotësojë të gjitha standardet. 

Kryetari i Grupit Parlamentar të Partisë Socialiste Taulant Balla dhe deputeti Arben Kamami inspektuan ecurinë e punimeve.  “Jo vetëm me buxhetin e shtetit, por edhe me ndihmën e qeverive mike dhe sipërmarrjeve private kemi arritur të bëjmë disa punë shumë të rëndësishme. 

Kjo shkollë bëhet falë një bashkëpunimi shumë të mirë që kemi me Emirin e Kuvajtit, Sheikut Nawaf Al Ahmad Al Jaber Al Sabah, të cilin gjej rastin ta falenderoj. Kam kërkuar që cilësia të jetë më e mira dhe po ashtu të plotësohet edhe kabineti i informacionit. 

Qëllimi është që në një shkollë në Mlizë apo në një shkollë në Tiranë, fëmijët të kenë të njëjtat standarde” tha Balla.  Balla gjithashtu shtoi se rikonstruksioni i rrugës që bashkon dy lagjet e fshatit Mlizë do të jetë objektivi i ardhshëm i cili do të krijojë një unazë në këtë zonë të bukur të Elbasanit.