Wednesday , May 12 2021

Kjo nuk pritej fare/ Ende pa marrë mandatin si deputet, Tom Doshi jep dorëheqjen

Tom Doshi ka hequr dorë nga mandati i deputetit. Në një letër të firmosur nga ai, Doshi i kërkon KQZ ta zëvëndësojë atë, ndërsa thotë se dorëheqja është e parevokueshme,.

“Unë i nënshkruari Tom Doshi me vullnetin tim të lirë dhe të plotë deklaroj se në datën 26 Prill jap dorëheqjen nga mandati im si deputet i Kuvendit të Shqipërisë. Deklaroj se sot në datë 26 Prill jap gjithashtu dorëheqjen nga mandati im si deputet i fituar pas zgjedhjeve 2021 dhe jap dorëheqjen nga lista shumëemërore e kandidatëve për deputet të PSD për zgjedhjet për Kuvendin e Shqipërisë të datës 25 Prill. I kërkoj KQZ të bëjë zëvendësimin tim si deputet sipas parashikimeve të Kodit Zgjedhor. Sa më sipër është në përputhje me vullnetin tim të lirë dhe të plotë dhe nuk kam sot në datë 26 Prill asnjë pretendim me vendimin e KQZ sipas të cilës mandati im i kalon kandidatit tjetër sipas parashikimeve të Kodit Zgjedhor. Kjo dorëheqje është e parevokueshme”, thuhet në letrën e Tom Doshit.

Kujtojmë se PSD, partia e tij, deri më tani ka marrë 3 mandate deputeti në zgjedhjet e 25 Prillit.

Më herët ambasada amerikane ishte shprehur kundër kandidimit të tij në zgjedhje. Ambasadorja Yuri Kim disa herë ka përmendur emrin e Doshit, si një person të cilit i është ndaluar hyrja në Shtetet e Bashkuara që në vitin 2018 për shkak se “është i përfshirë në korrupsion të nivelit të lartë”. Kjo nuk e pengoi Doshin të përfshihej në listat për deputet të partisë Social Demokrate, nga ku tashmë ka dhënë dorëheqjen.